رحلت لارا
ريحانة الدار، برنسيسة، فراشة ، قمر البيت
كلمات كتير سمعتهم اخر 5 أيام بوصفوا لارا . لارا اللي رحلت عن دنيتنا بهدوء وبدون أي وداع ، لارا الي وعدت انها تشوفنا هذا الأسبوع وأخلفت الوعد .لارا أخلفت وعدها بسبب اهمال سائق وطرق غير مهيئة ورقابة غير كافية على الطرقات.
صعب أختزل صداقة بتزيد عن 30 سنة ببعض الأحرف والكلمات بس لا شك انه لارا مدرسة...
لارا علمتنا انه الايمان بالله فوق كل اشي وانه بعد الموت ما في وجع أو ألم
لارا علمتنا انه العطاء لازم يكون بصمت ومش ب شوشرة (وحدة من كلماتها المفضلة)
لارا علمتنا انه الحنية لازم تكون بدون ضغط أو تدخل بحياة الشخص
لارا علمتنا انه الحزن بيكون بالقلب
لارا علمتنا الحكمة من غير ما تفرض رائيها بصرامة
لارا فرجتنا ابتسامة ملائكية دائمة برغم الوجع والألم
لارا تركت بصمة حلوة بكل بلد عاشت فيه وكل مكان اشتغلت فيه وكل مكان تعلمت فيه
ايماني اليوم انك مبسوطة مع عمو اكرم اللي شاف فيكي البلسم من كل ألم ومع رنا اللي كانت فخورة فيكي وعينيها بلمعوا وانتي بتحكي مع مي اللي مشتاقيتلك ومشتاقة تلعب معك زي زمان.
عايدة واسمحيلي اسميكي عايدة زي ما لارا بتحب تسميكي القلب الصابر، معن الصخرة الثابتة والسند الدائم، زياد رفيق لارا وسبب ضحكتها، غادة اخت لارا وحاملة كتير من صفاتها ، رامز صديقها الصدوق من اول يوم صرت جزء من العيلة وكرستينا أخت لارا الجديدة.
نتالي ونور وليث وجيرانها مي وماريا وأخيرا وليس اخرا اكرم ، نور عينيها وضحكتها من القلب وفرحتها ودافعها بالحياة ومصدر فخرها دايما.
مصابكم مصابنا وألمكم ألمنا وبوعدكم انه لارا ما رح تفارق قلوبنا.
الى أن نلتقي يا حبيبة قلبي
تهامة